กิเลสา ฌาปิตา มยฺหํ ภวา สพฺเพ สมูหตา สพฺพาสวา ปริกฺขีณา นตฺถิทานิ ปุนพฺภโว ฯ สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา คิริมานนฺโท เถโร อิมา คาถาโย อภาสิตฺถาติ ฯ คิริมานนฺทตฺเถรสฺส อปทานํ สมตฺตํ ฯ อฏฺฐมํ สลฬมณฺฑปิยตฺเถราปทานํ (๓๙๘)

---

[๔๐๐] นิพฺพุเต กกุสนฺธมฺหิ พฺราหฺมณมฺหิ วุสีมเต คเหตฺวา สลฬํ มาลํ มณฺฑปํ การยึ อหํ ฯ ตาวตึสํ คโต สนฺโต ลภามิ พฺยมฺหมุตฺตมํ อญฺเญ เทเว อภิโภมิ ๑ ปุญฺญกมฺมสฺสิทํ ผลํ ฯ ทิวา วา ยทิวา รตฺตึ จงฺกมนฺโต ฐิโต จหํ ฉนฺโน สลฬปุปฺเผหิ ปุญฺญกมฺมสฺสิทํ ผลํ ฯ อิมสฺมึเยว กปฺปมฺหิ ยํ พุทฺธมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ #๑ ม. ยุ. - ติโรจามิ ฯ