อพฺยาธิ ๑ จ สทา โหมิ สปฺปิเตลสฺสิทํ ผลํ มุขโธวนํ ทตฺวาน สงฺเฆ คณวรุตฺตเม ฯ ปญฺจานิสํเส อนุโภมิ กมฺมานุจฺฉวิเก มม วิสุทฺธกณฺโฐ มธุสฺสโร กาสสาสวิวชฺชิโต ฯ อุปฺปลคนฺโธ มุขโต อุปวายติ เม สทา ทธึ ทตฺวาน สมฺปนฺนํ พุทฺเธ สงฺเฆ คณุตฺตเม ฯ ภุญฺชามิ อมตํ ภตฺตํ ๒ วรํ กายคตาสตึ วณฺณคนฺธรโสเปตํ มธธ ทตฺวา ชิเน คเณ ฯ อนูปมํ อนญฺญมฺปิ ๓ ลภามิ วิมุตฺติรสํ ยถาภูตํ รสํ ทตฺวา พุทฺเธ สงฺเฆ คณุตฺตเม ฯ จตุโร ผเล อนุโภมิ กมฺมานุจฺฉวิเก มม อนฺนปานญฺจ ทตฺวาน พุทฺเธ สงฺเฆ คณุตฺตเม ฯ ทสานิสํเส อนุโภมิ กมฺมานุจฺฉวิเก มม อายุวา พลวา ธีโร วณฺณวา ยสวา สุขี ฯ ลาภี อนฺนสฺส ปานสฺส สูโร ปญฺญาณวา ตถา ๔ อิเม คุเณ ปฏิลเภ สํสรนฺโต ภเว อหํ ฯ ธูปํ ทตฺวาน สุคเต สงฺเฆ คณวรุตฺตเม ทสานิสํเส อนุโภมิ กมฺมานุจฺฉวิเก มม ฯ สุคนฺธเทโห ยสวา สีฆปญฺโญ จ กิตฺติมา ติกฺขปญฺโญ ภูริปญฺโญ หาสคมฺภีรปญฺญวา ฯ #๑ ม. อพฺยาธิ วิสโท โหมิ ฯ ยุ. ... วิสชี ... ฯ ๒ ยุ. จิตฺตํ ฯ #๓ ม. ยุ. อตุลิยํ ปิเว มุตฺติรสํ อหํ ฯ ๔ ม. สทา ฯ