จงฺกเม วา ปธาเน วา วิริเย โพธิปกฺขิเก ๑ เตสุ ญาณํ อุปฺปาเทตฺวา วิหรามิ ยถิจฺฉกํ ฯ สีลํ สมาธิ ปญฺญา จ วิมุตฺติ จ อนุตฺตรา เตสุ ญาณํ อุปฺปาเทตฺวา วิหรามิ สุขํ อหํ ฯ ผลปีเฐ ชิเน ทตฺวา สงฺเฆ คณวรุตฺตเม ทฺวานิสํเส ๒ อนุโภมิ กมฺมานุจฺฉวิเก มม ฯ โสณฺณมเย มณิมเย ทนฺตสารมเย พหู ปลฺลงฺกเสฏฺเฐ วินฺทามิ ผลปีฐสฺสิทํ ผลํ ฯ ปาทปีเฐ ชิเน ทตฺวา สงฺเฆ คณวรุตฺตเม ทฺวานิสํเส อนุโภมิ กมฺมานุจฺฉวิเก มม ฯ ลภามิ พหุเก ยาเน ปาทปีฐสฺสิทํ ผลํ ทาสี ทาสา จ ภริยา เย จญฺเญ อนุชีวิโน ฯ สมฺมา ปริจรนฺเตว ๓ ปาทปีฐสฺสิทํ ผลํ เตลอพฺภญฺชเน ทตฺวา สงฺเฆ คณวรุตฺตเม ฯ ปญฺจานิสํเส อนุโภมิ กมฺมานุจฺฉวิเก มม อพฺยาธิตา รูปวตา ขิปฺปํ ธมฺมนิสนฺธิตา ๔ ฯ ลาภิตา อนฺนปานสฺส อายุํ ปญฺจมกํ มม สปฺปิเตลญฺจ ทตฺวาน สงฺเฆ คณวรุตฺตเม ฯ ปญฺจานิสํเส อนุโภมิ กมฺมานุจฺฉวิเก มม ถามวา รูปสมฺปนฺโน ปหฏฺฐตนุโช สทา ฯ #๑ ม. โพธิปกฺขิเย ฯ ๒ ยุ. จตุรานิสํเส ฯ ๓ ม. ยุ. ปริจรนฺเต มํ ฯ #๔ ม. ยุ. ธมฺมนิสนฺติตา ฯ