ลภามิ จตุโร วณฺเณ หตฺถิสฺสรตนานิ จ ตานิ เม น วินสฺสนฺติ ตุมฺพกาเร ๑ อิทํ ผลํ ฯ หตฺถลีลงฺคเก ๒ ทตฺวา พุทฺเธ สงฺเฆ คณุตฺตเม ปญฺจานิสํเส อนุโภมิ กมฺมานุจฺฉวิเก มม ฯ สพฺพลกฺขณสมฺปนฺโน อายุปญฺญาสมาหิโต สพฺพายาสวินิมุตฺโต กาโย เม โหติ สพฺพทา ฯ ตนุธาเร สุนิสิเต สงฺเฆ ทตฺวาน ปิปฺผเล กิเลสกนฺตนํ ญาณํ ลภามิ อตุลํ สุจึ ฯ สณฺฑาเส สุคเต ทตฺวา สงฺเฆ คณวรุตฺตเม กิเลสลุญฺจนํ ๓ ญาณํ ลภามิ อตุลํ สุจึ ฯ นตฺถุเก สุคเต ทตฺวา สงฺเฆ คณวรุตฺตเม อฏฺฐานิสํเส อนุโภมิ กมฺมานุจฺฉวิเก มม ฯ สทฺธา สีลํ หิริญฺจาปิ อถ โอตฺตปฺปิยํ คุณํ สุตํ จาคญฺจ ขนฺตี ๔ จ ปญฺญา เม อฏฺฐมํ คุณํ ฯ ปีฐเก สุคเต ทตฺวา สงฺเฆ คณวรุตฺตเม ปญฺจานิสํเส อนุโภมิ กมฺมานุจฺฉวิเก มม ฯ อุจฺเจ กุเล ปชายามิ มหาโภโค ภวามหํ สพฺเพ มํ อปจายนฺติ กิตฺติ อพฺภุคฺคตา มม ฯ กปฺปสตสหสฺสานิ ปลฺลงฺกา จตุรสฺสกา ปริวาเรนฺติ มํ นิจฺจํ สํวิภาครโต อหํ ฯ #๑ ม. ยุ. ตุมฺพทาเน ฯ ๒ ม. มลหรณิโย ฯ ๓ ม. กิเลสภญฺชนํ ฯ ๔ ม. ยุ. ขนฺติญฺจ ฯ