อปฺปโกโธ อนุปายาโส สํสรนฺโต ภเว อหํ อาโยเค สุคเต ทตฺวา สงฺเฆ คณวรุตฺตเม ฯ ปญฺจานิสํเส อนุโภมิ กมฺมานุจฺฉวิเก มม สมาธีสุ น กมฺปามิ วสี โหมิ สมาธิสุ ฯ อเภชฺชปริโส โหมิ อาเทยฺยวจโน สทา ชายติ ๑ โภคสมฺปตฺติ ภเว สํสรโต มม ฯ ธูมเนตฺเต ชิเน ทตฺวา สงฺเฆ คณวรุตฺตเม ตีณานิสํเส อนุโภมิ กมฺมานุจฺฉวิเก มม ฯ สติ เม อุชุกา โหติ สุสมฺพนฺธา จ นฺหารุโย ๒ ลภามิ ทิพฺพสยนํ ๓ ตสฺส นิสฺสนฺทโต อหํ ฯ ทีปทาเน ๔ ชิเน ทตฺวา สงฺเฆ คณวรุตฺตเม ตีณานิสํเส อนุโภมิ กมฺมานุจฺฉวิเก มม ฯ ชาติมา องฺคสมฺปนฺโน ปญฺญวา พุทฺธสมฺมโต อิเม คุเณ ปฏิลเภ ตสฺส นิสฺสนฺทโต มม ๕ ฯ ตุมฺพเก จ กรณฺเฑ จ ทตฺวา พุทฺเธ คณุตฺตเม ทสานิสํเส อนุโภมิ กมฺมานุจฺฉวิเก มม ฯ ตทา ๖ คุตฺโต ๗ สุขสมงฺคี มหายสวา ตถา คติ วิภตฺติคตฺโต ๘ สุขุมาโล สพฺพีติปริวชฺชิโต ฯ วิปุเล จ คุเณ ลาภี สมฺมานจลนา ๙ มม สุวิวชฺชิตอุพฺเพโค ตุมฺพเก จ กรณฺฑเก ฯ #๑ ยุ. ชาติจฺจ ฯ ๒ ม. นหารโว ฯ ๓ ม. ยุ. ทิพฺพนยนํ ฯ ๔ ม. ยุ. ทีปธาเร ฯ #๕ ม. ยุ. อหํ ฯ ๖ ยุ. สทา ฯ ๗ ม. สุคุตฺโต ฯ ๘ ม. วิปตฺติวิคโต ฯ ยุ. ภตฺติกโต ฯ #๙ ม. สมาวจลนา ฯ