สมาธีสุ น กมฺปามิ วสี โหมิ สมาธิสุ อเภชฺชปริโส โหมิ อาเทยฺยวจโน สทา ฯ อุปฏฺฐิตสฺสติ โหมิ ตาโส มยฺหํ น วิชฺชติ เทวโลเก มนุสฺเส วา อนุพนฺธา อิเม คุณา ฯ อาธารเก ชิเน ทตฺวา สงฺเฆ คณวรุตฺตเม ปญฺจวณฺเณ ๑ ภยาภาโว อจโล โหมิ เกนจิ ฯ เยเกจิ เม สุตา ธมฺมา สติญาณปฺปโพธนา ธตา ๒ เม น วินสฺสนฺติ ภวนฺติ สุวินิจฺฉิตา ฯ ภาชเน ปริโภเค จ ทตฺวา พุทฺเธ คณุตฺตเม ตีณานิสํเส อนุโภมิ กมฺมานุจฺฉวิเก มม ฯ โสวณฺณมเย มณิมเย อโถปิ ผลิกามเย โลหิตงฺกมเย เจว ลภามิ ภาชเน อหํ ฯ ภริยา ทาสทาสี จ หตฺถิสฺสรถปตฺติเก อิตฺถี ปติพฺพตา เจว ปริโภคานิ สพฺพทา ฯ วิชฺชา มนฺตปเท เจว วิวิเธ อาคเม พหู สพฺพสิปฺปํ นิสาเมมิ ปริโภคานิ สพฺพทา ฯ ถาลเก สุคเต ทตฺวา สงฺเฆ คุณวรุตฺตเม ตีณานิสํเส อนุโภมิ กมฺมานุจฺฉวิเก มม ฯ โสวณฺณมเย มณิมเย อโถปิ ผลิกามเย โลหิตงฺกมเย เจว ลภามิ ถาลเก อหํ ฯ #๑ ม. ยุ. ปญฺจวณฺเณหิ ทายาโท ฯ ๒ ยุ. วตา ฯ