ตณฺหาสลฺลสฺส ฉินฺนตฺตา ปญฺญาสตฺถํ อนุตฺตรํ วชิเรน สมํ ญาณํ เตสํ นิสฺสนฺทโต ลเภ ฯ สูจิโย สุคเต ทตฺวา สงฺเฆ คณวรุตฺตเม ปญฺจานิสํเส อนุโภมิ กมฺมานุจฺฉวิเก มม ฯ นมสฺสิโย กงฺขจฺเฉโท อภิรูโป จ โภควา ติกฺขปญฺโญ สทา โหมิ สํสรนฺโต ภวาภเว ฯ คมฺภีรํ นิปุณํ ฐานํ อตฺถํ ญาเณน ปสฺสยึ วชิรคฺคสมํ ญาณํ โหติ เม ตมฆาตนํ ฯ นขจฺเฉทเน สุคเต ทตฺวา สงฺเฆ คณวรุตฺตเม ปญฺจานิสํเส อนุโภมิ กมฺมานุจฺฉวิเก มม ฯ ทาสทาสี ควสฺเส จ ภฏเก นาฏเก ๑ พหู นฺหาปิเต ภตฺตเก สูเท สพฺพตฺเถว ลภามหํ ฯ วิธูปเน สุคเต ทตฺวา ตาลปณฺเณ จ โสภเน อฏฺฐานิสํเส อนุโภมิ กมฺมานุจฺฉวิเก มม ฯ สีตํ อุณฺหํ น ชานามิ ปริฬาโห น วิชฺชติ ทรถํ นาภิชานามิ จิตฺตสนฺตาปนํ มม ฯ ราคคฺคิ โทสโมหคฺคิ มานคฺคิ ทิฏฺฐิอคฺคิ จ สพฺพคฺคิ นิพฺพุโต มยฺหํ ตสฺส นิสฺสนฺทโต มม ฯ โมรหตฺเถ จามริโย ทตฺวา สงฺเฆ คณุตฺตเม อุปสนฺตกิเลโสหํ วิหรามิ อนงฺคโณ ฯ #๑ ยุ. อารกฺเข ฯ