อาทิปุพฺพงฺคโม อาสิ ตสฺส ทานสฺสิทํ ผลํ ฉตฺเต ๑ สุคเต ทตฺวาน สงฺเฆ คณวรุตฺตเม ๒ ฯ อฏฺฐานิสํเส อนุโภมิ กมฺมานุจฺฉวิเก มม สีตํ อุณฺหํ น ชานามิ รโชชลฺลํ น ลิมฺปติ ฯ อนุปทฺทโว อนีติ จ โหมิ อปจิโต สทา สุขุมจฺฉวิโก โหมิ วิสทํ โหมิ มานสํ ฯ ฉตฺตสตสหสฺสานิ ภเว สํสรโต มม สพฺพาลงฺการยุตฺตานิ ตสฺส กมฺมสฺส วาหสา ฯ อิมํ ๓ ชาตึ ฐเปตฺวาน มตฺถเก ธารยนฺติ เม ตสฺมา ๔ อิมาย ชาติยา นตฺถิ เม ฉตฺตธารณา ฯ มม สพฺพํ กตํ กมฺมํ วิมุตฺติฉตฺตปตฺติยา ทุสฺสานิ สุคเต ทตฺวา สงฺเฆ คณวรุตฺตเม ฯ อฏฺฐานิสํเส อนุโภมิ กมฺมานุจฺฉวิเก มม สุวณฺณวณฺโณ วิรโช สปฺปภาโส ปตาปวา ฯ สินิทฺธํ โหติ เม คตฺตํ ภเว สํสรโต มม ทุสฺสสตสหสฺสานิ เสตา ปีตา จ โลหิตา ฯ ธาเรนฺติ มตฺถเก มยฺหํ ทุสฺสทานสฺสิทํ ผลํ โกเสยฺยกมฺพลิยานิ โขมกปฺปาสิกานิ จ ฯ สพฺพตฺถ ปฏิลภามิ เตสํ นิสฺสนฺทโต อหํ ปตฺเต จ สุคเต ทตฺวา สงฺเฆ คณวรุตฺตเม ฯ #๑ ม. ฉตฺเต จ สุกเต ทตฺวา ฯ ๒ โป. ม. ยุ. คุณวรุตฺตเม ฯ อิโต ปรํ อีทิสเมว ฯ #๓ ยุ. อิทํ ฯ ๔ ม. กสฺมา ฯ