ปเทสรชฺชํ วิปุลํ คณนาโต อสงฺขยํ เทวโลเก วสนฺตสฺส ปุญฺญกมฺมสมงฺคิโน ฯ เทวโลกานุปริยนฺเต ๑ รตนฉตฺตํ ธริสฺสติ อิจฺฉิสฺสติ ยทา วายํ ๒ ฉทนํ ทุสฺสปุปฺผชํ ฯ อิมสฺส จิตฺตมญฺญาย นิวทฺธํ ฉาทยิสฺสติ เทวโลกา จวิตฺวาน สุกฺกมูเลน โจทิโต ฯ ปุญฺญกมฺเมน สํยุตฺโต พฺรหฺมพนฺธุ ภวิสฺสติ กปฺปสตสหสฺสมฺหิ โอกฺกากกุลสมฺภโว ฯ โคตโม นาม นาเมน สตฺถา โลเก ภวิสฺสติ สพฺพเมตํ อภิญฺญาย โคตโม สกฺยปุงฺคโว ฯ ภิกฺขุสงฺเฆ นิสีทิตฺวา เอตทคฺเค ฐเปสฺสติ ปิลินฺทวจฺโฉ นาเมน เหสฺสติ สตฺถุสาวโก ฯ เทวานํ อสุรานญฺจ คนฺธพฺพานญฺจ สกฺกโต ภิกฺขูนํ ภิกฺขุนีนญฺจ คิหีนญฺจ ตเถว โส ฯ ปิโย หุตฺวาน สพฺเพสํ วิหริสฺสตินาสโว สตสหสฺเส กตํ กมฺมํ ผลํ ทสฺเสสิ เม อิธ ฯ สุมุตฺโต สรเวโคว กิเลเส ฌาปยึ ๓ อหํ อโห เม สุกตํ กมฺมํ ปุญฺญกฺเขตฺเต อนุตฺตเร ฯ ยตฺถ การํ กริตฺวาน ปตฺโตสฺมิ อจลํ ปทํ อนูนกํ ทานวรํ อทาสิ โย หิ มาณโว ฯ #๑ ม. เทวโลกปริยนฺตํ ฯ ๒ ม. ฉายํ ฯ ยุ. จายํ ฯ ๓ ม. ฌาปยี มม ฯ ยุ. ฌาปยิสฺสติ ฯ