พุทฺธานุจฺฉวิกํ เอตํ สพฺพปูชา ภวิสฺสติ อุปฺปลํ ปทุมํ วาปิ วสฺสิกํ อธิมุตฺตกํ ฯ จมฺปกํ นาคปุปฺผญฺจ มณฺฑปํ การยึ อหํ สตาสนสหสฺสานิ ฉตฺตฉายาย ปญฺญปึ ฯ ปจฺฉิมํ อาสนํ มยฺหํ อธิกํ สตมคฺฆติ สตาสนสหสฺสานิ ฉตฺตฉายาย ปญฺญปึ ฯ ปฏิยาเทตฺวา อนฺนปานํ กาลํ อาโรจยึ อหํ อาโรจิตมฺหิ กาลมฺหิ ปทุมุตฺตโร มหามุนิ ฯ วสีสตสหสฺเสหิ นิเวสนมุเปสิ เม ธาเรนฺตํ อุปริจฺฉตฺตํ สุผุลฺลปุปฺผมณฺฑเป ฯ วสีสตสหสฺเสหิ นิสีทิ ปุริสุตฺตโม ฉตฺตสตสหสฺสานิ สตสหสฺสมาสนํ ฯ กปฺปิยํ อนวชฺชญฺจ ปฏิคฺคณฺหาหิ จกฺขุมา ปทุมุตฺตโร โลกวิทู อาหุตีนํ ปฏิคฺคโห ฯ มมํ ตาเรตุกาโม โส สมฺปฏิจฺฉิ มหามุนิ ภิกฺขุโน เอกเมกสฺส ปจฺเจกํ ปตฺตทาสหํ ฯ ชหึสุ สมฺภตํ ๑ ปตฺตํ โลหปตฺตํ อธารยุํ สตฺตรตฺตินฺทิวํ พุทฺโธ นิสีทิ ปุปฺผมณฺฑเป ฯ โพธยนฺโต พหู สตฺเต ธมฺมจกฺกํ ปวตฺตยิ ธมฺมจกฺกํ ปวตฺเตนฺโต เหฏฺฐโต ปุปฺผมณฺฑเป ฯ #๑ ม. สุมฺภกํ ฯ ยุ. ปุปฺผกํ ฯ