สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปนสผลทายโก เถโร อิมา คาถาโย อภาสิตฺถาติ ฯ ปนสผลทายกตฺเถรสฺส อปทานํ สมตฺตํ ฯ นวมํ โสณโกฏิวิสตฺเถราปทานํ (๓๘๙)

---

[๓๙๑] วิปสฺสิโน ปาวจเน เอกํ เลณํ มยา กตํ จาตุทฺทิสสฺส สงฺฆสฺส พนฺธุมาราชธานิยา ฯ ทุสฺเสหิ ภูมึ เลณสฺส สนฺถริตฺวา ปริจฺจชึ อุทคฺคจิตฺโต สุมโน อกาสึ ปณิธึ ตทา ฯ อาราเธยฺยํ สมฺพุทฺธํ ปพฺพชฺชญฺจ ลเภยฺยหํ อนุตฺตรญฺจ นิพฺพานํ ผุเสยฺยํ สนฺติมุตฺตมํ ฯ เตเนว สุกฺกมูเลน กปฺเป นวุติ สํสรึ เทวภูโต มนุสฺโส จ กตปุญฺโญ วิโรจหํ ฯ