พระสุตันตปิฎกบาลี: 32/466/387 388
สุตฺตนฺตปิฏเก ขุทฺทกนิกายสฺส อปทานภาค ๑
ปญฺจมํ ผารุสผลทายกตฺเถราปทานํ (๓๘๕)
[๓๘๗] สุวณฺณวณฺณํ สมฺพุทฺธํ อาหุตีนํ ปฏิคฺคหํ
รถิยํ ปฏิปชฺชนฺตํ ผารุสผลํ อทาสหํ ฯ
เอกนวุเต อิโต กปฺเป ยํ ผลํ อททํ อหํ
ทุคฺคตึ นาภิชานามิ ผลทานสฺสิทํ ผลํ ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา ผารุสผลทายโก เถโร อิมา คาถาโย
อภาสิตฺถาติ ฯ
ผารุสผลทายกตฺเถรสฺส อปทานํ สมตฺตํ ฯ
ฉฏฺฐํ วลฺลิผลทายกตฺเถราปทานํ (๓๘๖)
[๓๘๘] สพฺเพ ชนา สมาคมฺม อาคมึสุ วนํ ตทา
ผลมเนฺวสมานา เต อลภึสุ ผลํ ตทา ฯ
