อิตฺถํ สุทํ อายสฺมา อมฺพฏผลทายโก เถโร อิมา คาถาโย อภาสิตฺถาติ ฯ อมฺพฏผลทายกตฺเถรสฺส อปทานํ สมตฺตํ ฯ ทุติยํ ลพุชทายกตฺเถราปทานํ (๓๘๒)

---

[๓๘๔] นคเร พนฺธุมติยา อาสึ อารามิโก ตทา อทฺทสํ วิรชํ พุทฺธํ คจฺฉนฺตํ อนิลญฺชเส ฯ ลพุชสฺส ผลํ คยฺห พุทฺธเสฏฺฐสฺสทาสหํ อากาเส ฐิตโก สนฺโต ปฏิคฺคณฺหิ มหายโส ฯ ปีติสญฺชนนํ ๑ มยฺหํ ทิฏฺฐธมฺมสุขาวหํ ผลํ พุทฺธสฺส ทตฺวาน วิปฺปสนฺเนน เจตสา ฯ อธิคญฺฉึ ตทา ปีตึ วิปุลญฺจ สุขุตฺตมํ อุปฺปชฺชเตว รตนํ นิพฺพตฺตสฺส ยหึ ๒ ตหึ ฯ เอกนวุเต อิโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ ฯ สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ #๑ ม. ยุ. วิตฺติสญฺชนนํ ... ฯ ๒ ม. ตหึ ฯ