ทุติยํ ปาฏลิปุปฺผิยตฺเถราปทานํ (๓๗๒)

---

[๓๗๔] วิปสฺสี นาม ภควา สยมฺภู อคฺคปุคฺคโล ปุรกฺขโต สสิสฺเสหิ พนฺธุมํ ปาวิสี ชิโน ฯ ตีณิ ปาฏลิปุปฺผานิ อุจฺฉงฺเค ฐปิตานิ เม สีสํ นฺหายิตุกาโมหํ ๑ นทีตีรํ ๒ อคจฺฉหํ ฯ นิกฺขมฺม พนฺธุมติยา อทฺทสํ โลกนายกํ อินฺทีวรํว ชลิตํ อาทิตฺตํว หุตาสนํ ฯ พฺยคฺฆูสภํว ปวรํ อภิชาตํว เกสรึ คจฺฉนฺตํ สมณานคฺคํ ภิกฺขุสงฺฆปุรกฺขตํ ฯ ตสฺมึ ปสนฺโน สุคเต กิเลสมลโธวเน คเหตฺวา ตีณิ ปุปฺผานิ พุทฺธเสฏฺฐํ อปูชยึ ฯ เอกนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปาฏลิปุปฺผิโย เถโร อิมา คาถาโย อภาสิตฺถาติ ฯ ปาฏลิปุปฺผิยตฺเถรสฺส อปทานํ สมตฺตํ ฯ #๑ ม. ... นฺหายิตุกาโม ว ฯ ๒ ม. ยุ. นทีติตฺถํ ฯ