จตุตฺถํ เกสรปุปฺผิยตฺเถราปทานํ (๓๖๔)

---

[๓๖๖] วิชฺชาธโร ตทา อาสึ หิมวนฺตมฺหิ ปพฺพเต อทฺทสํ วิรชํ พุทฺธํ จงฺกมนฺตํ มหายสํ ฯ ตีณิ เกสรปุปฺผานิ สีเส กตฺวานหํ ตทา อุปสงฺกมฺม สมฺพุทฺธํ เวสฺสภุํ อภิปูชยึ ฯ เอกตฺตึเส อิโต กปฺเป ยํ กมฺมมกรึ ตทา ทุคฺคตึ นาภิชานามิ พุทฺธปูชายิทํ ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เกสรปุปฺผิโย เถโร อิมา คาถาโย อภาสิตฺถาติ ฯ เกสรปุปฺผิยตฺเถรสฺส อปทานํ สมตฺตํ ฯ ปญฺจมํ องฺโกลปุปฺผิยตฺเถราปทานํ (๓๖๕)

---

[๓๖๗] ปทุโม นาม สมฺพุทฺโธ จิตฺตกูเฏ วสี ตทา ทิสฺวาน ตมหํ พุทฺธํ สยมฺภุํ อุปคญฺฉหํ ๑ ฯ องฺโกลํ ปุปฺผิตํ ทิสฺวา โอจินิตฺวานหํ ตทา อุปคนฺตฺวาน สมฺพุทฺธํ ปูเชสึ ปทุมํ ชินํ ฯ เอกตฺตึเส อิโต กปฺเป ยํ กมฺมมกรึ ๒ ตทา ทุคฺคตึ นาภิชานามิ พุทฺธปูชายิทํ ผลํ ฯ #๑ ม. อปราชิตํ ฯ ๒ ม. ยุ. ... ปุปฺผมภิปูชยึ ฯ