ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ตีณิกิงฺกณิปูชโก เถโร อิมา คาถาโย อภาสิตฺถาติ ฯ ตีณิกิงฺกณิปูชกตฺเถรสฺส อปทานํ สมตฺตํ ฯ ปญฺจมํ นฬาคาริกตฺเถราปทานํ (๓๔๕)

---

[๓๔๗] หิมวนฺตสฺสวิทูเร หาริโก นาม ปพฺพโต สยมฺภู ๑ นาม นาเมน รุกฺขมูเล วสี ตทา ฯ นฬาคารํ กริตฺวาน ติเณน ฉาทยึ อหํ จงฺกมํ โสธยิตฺวาน สยมฺภุสฺส อทาสหํ ฯ จตุทฺทเสสุ กปฺเปสุ เทวโลเก รมึ อหํ จตุสตฺตติกฺขตฺตุญฺจ เทวรชฺชมการยึ ฯ สตฺตสตฺตติกฺขตฺตุญฺจ จกฺกวตฺติ อโหสหํ ปเทสรชฺชํ วิปุลํ คณนาโต อสงฺขยํ ฯ อุพฺพิทฺธํ ภวนํ มยฺหํ อินฺทลฏฺฐีว อุคฺคตํ สหสฺสถมฺภํ อตุลํ วิมานํ สปฺปภสฺสรํ ฯ เทฺวสมฺปตฺตึ อนุโภตฺวาน สุกฺกมูเลน โจทิโต โคตมสฺส ภควโต สาสเน ปพฺพชึ อหํ ฯ #๑ ม. ยุ. สยมฺภู นารโท นาม ฯ