ปเทสรชฺชํ วิปุลํ คณนาโต อสงฺขยํ อนุโภมิ สกํ กมฺมํ ปุพฺเพ สุกตมตฺตโน ฯ เทฺวนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ ธชทานสฺสิทํ ผลํ ฯ อิจฺฉมาโน จหํ อชฺช สกานนํ สปพฺพตํ โขมทุสฺเสน ฉาเทยฺยํ ตทา มยฺหํ กเต ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ธชทายโก เถโร อิมา คาถาโย อภาสิตฺถาติ ฯ ธชทายกตฺเถรสฺส อปทานํ สมตฺตํ ฯ จตุตฺถํ ตีณิกิงฺกณิปูชกตฺเถราปทานํ (๓๔๔)

---

[๓๔๖] หิมวนฺตสฺสวิทูเร ๑ ภูตคโณ นาม ปพฺพโต ตตฺถทฺทสํ ปํสุกูลํ ทุมคฺคมฺหิ วิลคฺคิตํ ฯ ตีณิ กิงฺกณิปุปฺผานิ โอจินิตฺวานหํ ตทา หฏฺโฐ หฏฺเฐน จิตฺเตน ปํสุกูลํ อปูชยึ ฯ เอกตฺตึเส อิโต กปฺเป ยํ กมฺมมกรึ ตทา ทุคฺคตึ นาภิชานามิ ติณฺณํ ปุปฺผานิทํ ผลํ ฯ #๑ โป. ยุ. ___ อวิทูเร ฯ อิโต ปรํ อีทิสเมว ฯ